نعم, الشرعية للتحرير

أتوجه بهذا المقال إلي كل من لا يزال يشكك في شرعية ميدان التحرير, قال أيه الميدان لا يمثل الأغلبية أصلهم كام مليون و احنا 85 مليون .. من فضلكم : أرحمونا بقي!

طب كنتوا فين في الـ 30 سنة اللي فاتوا؟ أتنتقدون ثوار التحرير الآن؟ أنتم وكل جيلكم سلبتم الشباب أحلامه، واحتللتم المناصب التي يمكن أن يطمح إليها، وحرمتموه أبسط الحقوق التي يطمح إليها: الملجأ والزواج، وأعطيتموه سفينة غارقة نخرة امتلأت بالثقوب نُهب كل لوح خشب وكل مسمار فيها، وقلتم له إن عليه أن يتولى الإبحار بها بعدكم .. في بحر يعج بالأساطيل وحاملات الطائرات التي صنعها الآخرون، ماذا كنتم تفعلون طيلة هذا الوقت حينما كانت السفينة لكم ؟ دلوقتي إحنا اللي هنخرب البلد؟ بأي منطق تتحدثون؟

في ليلة 23 يوليو 1952 عندما قام تنظيم سري بالجيش أطلقوا علي أنفسهم اسم الضباط الأحرار بانقلاب عسكري .. بعدها بساعات أذاع السادات بيانه الشهير من مبني الإذاعة و التلفزيون معلنا للشعب عن قيام ثورة في مصر. الغريب بقي بالرغم أن عدد ضباط هذا التنظيم لم يتجاوز 20 شخصا لم يعرفهم أحد إلا بعد قيام الثورة, يعني محدش انتخبهم ولا فوضهم عشان يعملوا ثورة باسم الشعب. لماذا لم يشكك أحدكم في شرعية ثورة 23 يوليو طيلة 60 عاما؟ لماذا لم ينتقد أحد 20 شخصا فوضوا أنفسهم ليصنعوا التغيير باسم الشعب و تنتقدون الآن الملايين التي تطالب بحقوقها في الميدان؟ بأي منطق تتحدثون؟

بالنسبة للحالة الأمنية المتردية و الحالة الاقتصادية السيئة و الناس اللي مش لاقيه تأكل, هم ثوار التحرير مالهم؟ لماذا تلومون الثوار و لا تلومون الشرطة التي كان النظام السابق سبب في اختفائها ليخير الناس ما بين مبارك و الفوضى؟ لماذا تنتقدون مجموعة من المصريين يمارسون حقا تكفله لهم كل دساتير العالم بل و تلزم النظام بحمايتهم و المحافظة علي أمنهم و سلامتهم؟ و بعدين هي مصر كلها ميدان التحرير ولا ايه؟ بأي منطق تتحدثون؟

نيجي بقي للأرقام: حسب تقدير الخبراء فإن عدد المنتفضين علي مبارك في كل ربوع مصر حوالي 8 مليون, لو قلنا في 8 مليون زيهم لم يشاركوا في الثورة و لهم نفس الرأي يبقي المجموع 16 مليون. مصر تعداد سكانها 85 مليون, ننقص منهم 4,5 مليون هجرة مؤقتة و 42 مليون سكان تحت 18 سنة أو فوق 65 سنة (هم غير مؤهلين للمشاركة في الحياة السياسية) و 2,5 مليون جهاز أمني و عسكري و 7 مليون كانوا علي موقف محايد من الثورة يصبح المجموع المتبقي 29 مليون, منهم 16 مليون مع ثوار التحرير. يبقي كده النسبة علي أقل تقدير 55%. بأي منطق تتحدثون؟

طب الناس اللي مش مع التحرير دول يا تري عارفين يعني أيه مظاهرات سلمية؟ يا تري حاولوا ينزلوا في أول أيام الثورة لما كانت كل المطالب عيش و حرية و تغيير؟ ليه تجاهلوا دعوتنا لما نزلنا يوم 25 يناير و قلنا "يا أهالينا انضموا لينا" .. زعلانين دلوقتي عشان بنتجاهلكوا؟ بأي منطق تتحدثون؟

بجد الناس دي مغيبة أو كانت عايشة في بلد تانية. هم نسيوا 1200 ضحية في غرق العبارة و 400 قتيل في قطار الصعيد و200 قتيل في حريق مسرح بني سويف و550 في حادث الدويقة و 760 شهيد منذ قيام الثورة أو غيرها من حوادث راح ضحيتها مصريون، من دون مساءلة حقيقية لمسئول، أو كلمة عزاء من نيرون مصر غير المأسوف على رحيله؟ ده غير التعليم و الصحة و الاقتصاد المتدهور و موارد مصر التي لا ينعم بها أكثر من 1% من الشعب بينما يعيش 40% من المصريين تحت خط الفقر. طب مين المسئول عن قتل خالد سعيد و سيد بلال؟ مين المسئول عن صفر المونديال و البحث العلمي المتدهور؟ مين المسئول عن الحوادث الإرهابية؟ مين المسئول عن 9 مليون مصاب بالكبد الوبائي و 8 مليون بالسكر و أعلى نسبة سرطان أطفال في العالم و 8000 حوادث طرق و 35 مليون جاهل. بأي منطق تتحدثون؟

أما بقي الناس اللي مش عايزة مبارك يتحاكم أحب أفكرهم بالحديث ده: إنما هلك من كان قبلكم انه إذا سرق فيهم القوي تركوه وإذا سرق فيهم الضعيف أقاموا عليه الحد ، والله لو إن فاطمة بنت محمد سرقت لقطعت يدها. لو مبارك كان برئ من تهم الفساد و التربح و إهدار المال العام و التحريض علي قتل المتظاهرين, أزاي ممكن يكون برئ من تهم الفساد السياسي؟ أزاي يبقي برئ و أصلا كل أعمدة نظامه في السجن؟ يعني مكنش شايف؟ أمال هو كان رئيس جمهورية بيعمل أيه؟ كلكم راع و كلكم مسئول عن رعيته يا سادة. بأي منطق تتحدثون؟

بالنسبة للمطالب اللي مش عايزة تخلص و السقف اللي عمال يرتفع, أحب أقولكم أننا دلوقتي معدش لينا سقف والمطالب دي بنطالب بيها عشان الشعب كله يعني محدش هيأخد من وراها حاجة يحطها في جيبه.

أعزائي رواد مصطفي محمود, لو كان اختلافكم نابع من خوفكم علي البلد تأكدوا إننا دفعنا الثمن غالي من دماء شهدائنا و مصر فعلا هتبقي أحسن. لو كان اختلافكم من أجل الاختلاف و صعبان عليكم مصر تبقي دولة متقدمة يا ريت تشوفوا مكان غير ميدان مصطفي محمود, بجد حرام يقترن اسم عالم جليل زي ده بمجموعة هان عليهم دم الشهداء ومش هاين عليهم ييعيشوا زى البنى ادمين. أحب أفكركم أن مصطفي محمود نفسه هو اللي قال: الأحرار يبكون شهدائهم و العبيد يبكون جلاديهم. يا ريت بس تفكروا هتقولوا ايه لأولادكم و أحفادكم لما تدرس ثورة 25 يناير في مناهج التاريخ, يا تري هتردوا تقولوا ايه لما يسألكوا هل شاركتوا في الثورة و كان ايه موقفكم منها.

http://192.168.1.214:8000/main.html

fff

ثوار التحرير دلوقتي هم أعلي سلطة في البلد. هم اللي قاموا بالثورة دي و هم المسئولين عنها لحد الآخر. يا ترضي بكده يا تقعد ساكت. و اللي عاجبه علي الكحل يتكحل اللي مش عاجبه يترحل و يشوف بلد تانية.